A Ruta dos Faros, unha forma de coñecer a costa galega desde o mar
·
Os GALP son os impulsores deste proxecto de cooperación
que permite coñecer o territorio a través de diferentes actividades vencelladas
aos profesionais do mar.
A Ruta dos Faros constitúe un fermoso itinerario pola costa galega que
se pode percorrer a pé, en moto, en caravana, en coche ou incluso en barco.
Esta iniciativa impulsada polos Grupos de Acción Local do Sector Pesqueiro
(GALP) de Galicia, ten como obxectivo dar a coñecer o territorio galego vinculándoo
co mar a través das persoas que traballan nel.
O proxecto de cooperación ofrece un turismo mariñeiro de calidade a
través de diferentes actividades como a Travesía Náutica Xacobea, peregrinación
a Santiago por mar. Unha forma de ver a costa desde a outra perspectiva,
combinando a navegación e a ruta terrestre. Dentro do itinerario, as persoas
interesadas poden escoller entre a ruta norte -desde Ribadeo a Portosín ou
Boiro-Cabo de Cruz- e a ruta do sur -de Baion ou Vigo a Boiro-Cabo de Cruz ou
Portosín-. Unha experiencia única coa que se pode obter a Certificación de Peregrinación
Náutica.
Outro dos encantos desta ruta é a posibilidade de realizar actividades
ligadas ao mundo do mar co selo de calidade MarGalaica. Entre elas figuran
actividades coas redeiras, pescadores, mariscadoras, conserveiras e outros
moitos profesionais do mar.
Unha forma de impulsar e dar a coñecer o valor e
o traballo dos oficios do mar a través do turismo de calidade.
Ademais destas accións, na ruta tamén se pode gozar da mellor
gastronomía local. Os restaurantes que participan constan do selo gastronómico
Km 0 Margalaica, que indica que os seus pratos están elaborados con filosofía
km.0, o que quere dicir que empregan produtos da pesca costeira e do marisqueo
dos portos e lonxas máis próximos. Isto aumenta a calidade e a frescura do
produto e reduce a pegada de carbono.
Este proxecto, que comezou a súa andanza no 2016, conta cun
investimento de 208.050 € dos GALP.
Comentarios
Publicar un comentario