A reunión dos GALP nacionais deu a coñecer as necesidades e os desafíos do sector do mar

O xerente do GALP Golfo Ártabro Sur, Federico López Viñas, participou no evento no que a heteroxeneidade do sector pesqueiro, a mellora da coordinación entre as diferentes entidades do ámbito e a necesidade do relevo xeracional foron definidos como algúns dos retos a superar.

As diferentes necesidades do sector pesqueiro ao longo do territorio español así como a mellora da coordinación entre as diferentes entidades do ámbito foron definidas como parte dos retos a abordar na I Reunión Técnica dos GALP para o novo período do Fondo Europeo Marítimo e de Pesca e Acuicultura (FEMPA) para o 2021-2027. O evento tivo como obxectivo tratar a situación actual dos GALP, así como as súas futuras accións, a continuidade dos seus proxectos, as posibles novas iniciativas e as estratexias de desenvolvemento local. Asistiron á conferencia 41 grupos, entre os que se atopaba o GALP Golfo Ártabro Sur.

No encontro extraéronse importantes conclusións. Primeiramente, a necesidade de asegurar unha presencia equilibrada e efectiva de todos os axentes nos instrumentos de xestión e seguimento do Programa Operativo (PO). Tamén se tratou a importancia de mellorar a coordinación e comunicación na instauración das diferentes estratexias de desenvolvemento local participativo. En canto ao nivel de execución dos proxectos, as previsións son positivas de camiño ao 2023. Tamén se falou no evento sobre como mellorar a coordinación entre os GALP e os seus Organismos Intermedios de Gestión (OIG). Ademais, é importante continuar coa identificación e difusión de boas prácticas de proxectos, amosando os avances conseguidos nestes e podendo empregarse noutros contextos. Por outra banda, explicouse que os fondos FEMP pasarán a ser agora os fondos FEMPA.

Información á poboación

Outro dos elementos que se considerou clave foron as accións de formación e información á poboación destinataria das axudas, elemento crucial para que os diferentes GALP dean a coñecer o seu traballo e as súas funcións, abrindo paso a novos proxectos nos diferentes territorios.

A muller no mundo do mar

En materia de igualdade confírmase que é necesario incrementar o número de proxectos que teñan que ver co impulso do papel da muller no sector do mar, para dar a coñecer a súa presenza e incrementala.

Remando para reducir a pegada de carbono 

O medio ambiente tamén foi un punto importante a tratar nesta I Reunión. Nela falouse das diferentes accións levadas a cabo polos GALP para reducir a contaminación no mundo do mar, e como continuar diminuíndo a polución co obxectivo de protexer o planeta así como de reducir o consumo e polo tanto o propio gasto.

Importancia do relevo xeracional

O sector pesqueiro precisa de xente nova para garantir o relevo xeracional no sector pesqueiro, cada vez máis avellentado. Por este motivo se destacou a necesidade de levar a cabo actividades para achegar á mocidade ao sector mariñeiro.