Xornadas para formación á presentación das axudas FEMPA 2024

Dende o GALP Golfo Ártabro Sur realizáronse varias xornadas de información a potenciais promotores

Nos días 15, 16 e 19 de febreiro o GALP Golfo Ártabro Sur realizou as xornadas de presentación das axudas FEMPA na convocatoria 2024. Estas xornadas tiveron como principal obxectivo conseguir que tódolos promotores teñan acceso á información, para isto realizáronse as xornadas tanto en formato presencial como en formato online.

Nestas xornadas déronse a coñecer os posibles proxectos que poden ser financiados mediante os fondos FEMPA na convocatoria do 2024 en cada un dos obxectivos estratéxicos, facendo fincapé nos seguintes eidos: pesca, comercialización, transformación, turismo, benestar social, patrimonio, medio ambiente, gobernanza, etc. Para isto, amosáronse proxectos de éxito da pasada anualidade, e incluso do pasado programa, que permitiron ver aos promotores ideas que poidan enriquecer a realización dos seus proxectos.

Para a inauguración das xornadas contouse coa presenza do secretario da entidade Manuel Suárez, quen animou aos participantes a presentar os seus proxectos no GALP. Incidiu tamén sobre a importancia dos fondos FEMPA para impulsar ao sector do mar como eixo principal do sector primario e conseguir o pulo necesario no territorio que permita un desenvolvemento sostible das actividades marítimas, proporcionando oportunidades que propicien o relevo xeracional. Así mesmo, instou aos presentes a vivir no Golfo Ártabro Sur mirando cara o mar e as súas oportunidades.

O equipo técnico do GALP Golfo Ártabro Sur foi o encargado de dar a coñecer a tódolos presentes os pormenores das axudas. Como punto central da xornada, formouse aos asistentes en presentar correctamente a documentación e conseguir o éxito no proxecto.

Cada unha das xornadas realizadas tiña un público obxectivo, a pesar de estar abertas ao público en xeral. A xornada do día 15 de febreiro realizouse na sede do GALP Golfo Ártabro Sur, en horario de tarde dedicada a un público máis xeneralizado, a cal foi un auténtico éxito. A xornada do día 16 realizouse online en horario de mañá, para favorecer a tódolos organismos públicos e empresas a súa asistencia, o que finalmente conseguiu promover multitude de proxectos. E finalmente, o día 19 realizouse en horario de mañá na Lonxa de A Coruña a xornada final dedicada especificamente ao sector pesqueiro e ás súas necesidades, co fin de facer chegar as axudas ao seu punto principal de traballo e favorecer o coñecemento das mesmas.

Unha vez finalizada a xornada, resolvéronse persoalmente todas as dúbidas existentes e asesorouse a cada unha das persoas asistentes de forma individual na temática correspondente.

Con estas xornadas buscábase dar un pulo ao sector do mar, feito que se viu reflexado na convocatoria.