Convite ás xuntazas dos proxectos de cooperación “Un mar en común” e “Bitácoras do Mar”

Terán lugar o xoves 16 en Sada e o venres 17 na lonxa da Coruña e están dirixidas a representantes da xunta directiva e da asemblea do GALP Golfo Ártabro Sur

 

O GALP Golfo Ártabro Sur acollerá os próximos xoves 16 e venres 17 os encontros dos proxectos de cooperación “Un mar en común” e “Bitácoras do Mar” aos que está convidados representantes da xunta directiva e da asemblea. Van ser dúas grandes oportunidades para compartir coñecemento, experiencias e opinións. 

Os interesados en asistir poden comunicalo a través do correo electrónico galpgolfoartabrosur@gmail.com ou no teléfono 881 896 417.

O xoves 16 (17.00h), o consultor en comunicación e estratexia comercial Roberto Pérez Marijuán dirixirá o obradoiro de procesos participativos de “Un mar en común” na sede do GALP (Casa do Mar de Sada. Avda. do Porto, 21). O obxectivo da sesión é coñecer e aprender algunhas das metodoloxías de colaboración entre persoas para fomentar os procesos participativos.

Ao día seguinte, o venres 17 (10.30-17.00h) na lonxa da Coruña, e no marco do tamén proxecto de cooperación “Bitácoras do mar”, terá lugar o parladoiro denominado “O produto pesqueiro: consumo e innovación”. Durante esta xuntaza poremos en valor o produto pesqueiro como eixo vertebrador e de referencia para impulsar a sostibilidade do seu territorio de referencia. O obxectivo é visibilizar o sector mar-pesca como axente principal de proxectos tractores nas EDLP.

Entre os relatores convidados estarán Marta Villaverde, subdirectora xeral de Pesca e Mercados da Pesca da Xunta de Galicia; Carmen González Sotelo, do Instituto de Investigacións Mariñas (IIM-CSIC) e Miguel García Silvarredonda, cociñeiro e profesor do FP Dual Gastronomía e cociña. CIFP Paseo das Pontes, na Coruña. Para finalizar, haberá unha degustación de produtos do mar do noso territorio.