Entrega do recoñecemento de boas prácticas á Asociación de Desenvolvemento Rural Mariñas - Betanzos

A Red Española de Grupos de Pesca (REGP) incluíu o seu proxecto de ecoturismo no "V Catálogo de Buenas Prácticas en DLP del FEMP".

O secretario do GALP Golfo Ártabro Sur, José Garrote, entregou o pasado 22 de decembro ao presidente da Asociación de Desenvolvemento Rural Mariñas – Betanzos, José Antonio Santiso Miramontes e ao xerente, Jorge Blanco, o recoñemento pola inclusión do seu proxecto de ecoturismo no "V Catálogo de la Red Española de Grupos de Pesca (REGP) de Buenas Prácticas en DLP del FEMP". Esta nova experiencia financiada polo GALP Golfo Ártabro Sur permite “ver” o fondo do mar sen mergullarse a través dunhas gafas de realidade virtual coas que visualizar vídeos 360º de zonas de gran valor ecolóxico.

Este proxecto é un dos tres financiados pola nosa entidade e incluídos no catálogo oficial da REGP. Os outros dous son os proxecto de cooperación Proxecto Tanza, a través do que se propuxo a creación dun ecosistema emprendedor de proxectos e iniciativas de colaboración entre entidades de inclusión social e o sector pesqueiro; e Relevo2. Mocidade a bordo para promoción do relevo xeracional entre a mocidade. Do territorio do GALP Golfo Ártabro Sur participou nesta iniciativa o alumnado do IES David Buján (Cambre), IES Monte das Moas (A Coruña), O Mosteirón e Isaac Díaz Pardo (ambos de Sada) e Rego de Trabe (Culleredo).