As estratexias de desenvolvemento local participativo e o seu papel na economía azul

O conselleiro do Mar, Alfonso Villares, salientou na xornada "As estratexias de desenvolvemento local participativo promotoras da Economía Azul" a importancia dos Grupos de Acción Local do Sector Pesqueiro (GALP) como elementos clave para o impulso dunha economía azul sostible. No evento, organizado pola Consellería do Mar, destacouse o papel destes grupos na promoción de proxectos innovadores que buscan equilibrar o capital humano e os recursos mariños das zonas costeiras, en liña cos obxectivos do Fondo Europeo Marítimo, de Pesca e Acuicultura (FEMPA).

Os GALP como motores de transformación

Durante a súa intervención, o conselleiro, acompañado pola directora xeral de Desenvolvemento Pesqueiro, subliñou a capacidade dos GALP para fomentar proxectos transformadores vinculados ao territorio. Estes proxectos permiten combinar sustentabilidade e crecemento económico, ademais de visibilizar novas oportunidades nos sectores marítimos e pesqueiros.

O evento forma parte da Estratexia de Economía Azul de Galicia, unha ferramenta de planificación clave que recoñece a relevancia histórica, económica e sociocultural do litoral galego. Esta estratexia identifica sectores como a pesca, a transformación, o sistema portuario e o turismo costeiro como piares fundamentais do crecemento económico, mentres aposta pola diversificación e innovación para xerar novas oportunidades de emprego.

Proxectos destacados no Golfo Ártabro Sur

Entre os proxectos presentados no foro, destacou a iniciativa do GALP Golfo Ártabro Sur para a produción de mobiliario de formigón reciclado a partir de cáscaras de mexillón. Este proxecto exemplifica como a economía circular pode transformar residuos en recursos útiles, xerando beneficios ambientais e sociais.

Os outros GALP participantes tamén compartiron iniciativas relevantes que subliñan o papel transformador da economía azul en Galicia, desde a valorización do patrimonio ata a mellora da biodiversidade mariña.

Aposta pola sustentabilidade e a colaboración

A Estratexia da Enonomía Azul de Galicia (EAG) busca impulsar actividades mariñas sostibles a través de tres grandes obxectivos:

1. Integrar as actividades que a conforman mediante conectores de innovación.

2. Situar sectores emerxentes como referentes internacionais.

3. Garantir a sustentabilidade e a circularidade en actividades tradicionais como a pesca, o marisqueo e a acuicultura como actividades núcleo.

Estes obxectivos orientan as actuacións cara a protección dos ecosistemas mariños e a preservación dos recursos para as xeracións futuras.

Unha aposta de futuro

Os oito GALP galegos, que agrupan máis de 400 organizacións locais, inclúen preto de 100 entidades do sector pesqueiro que representan máis de 13.000 profesionais do mar. De cara a 2025, a Consellería do Mar reforzará o seu apoio a estes grupos cunha partida superior a 20 millóns de euros nos orzamentos, reafirmando o compromiso co desenvolvemento sostible e a economía azul.

Con iniciativas como estas, Galicia consolídase como referente na xestión responsable dos recursos mariños e no aproveitamento das oportunidades que ofrece a economía azul. No GALP Golfo Ártabro Sur, seguiremos traballando para liderar proxectos innovadores que promovan a sustentabilidade e o desenvolvemento das nosas comunidades costeiras.