Un estudo ambiental contabiliza en 2.226 a poboación de especies mariñas e terrestes do territorio

A mostra sobre esta investigación pode verse na sede do GALP Golfo Ártabro Sur ata finais de xaneiro. Todas as entidades interesadas poden solicitarlla á entidade de xeito gratuíto.

O Grupo Naturalista Hábitat presentou o estudo “Descubrindo os ecosistemas do Golfo Ártabro Sur” que realizou a instancias da entidade co obxectivo de facer unha radiografía ambiental do territorio a día de hoxe. O resumo do mesmo está “condensado” na exposición do mesmo nome e que ata finais de xaneiro se pode ver na sede do GALP (1ª planta da Casa do Mar de Sada). A mostra está a disposición de todas as entidades que a soliciten no email galpgolfoartabrosur@gmail.com ou nos teléfonos 881 896 417 – 604 053 257.

Tras meses de investigación, os investigadores de Hábitat determinaron que nos 7 municipios de Bergondo, Sada, Oleiros, Cambre, Culleredo, A Coruña e Arteixo hai unha poboación total de 2.226 especies, das cales 826 son mariñas e 1.271 terrestres, e 129 poden estar presentes tanto na costa e coma no interior.

A maior diversidade específica atópase na fauna con 1.300 especies e 3 especies de protozoos, con 573 especies de insectos. Dentro da flora (algas, fungos e plantas vasculares) o número de especies ascende a 923. Un total de 209 especies presentan algún grao de protección nos catálogos galego e español de especies ameazadas, das cales 59 son mariñas e 95 son terrestres e 55 podemos velas tanto en costa como no interior. Así mesmo, 41 especies están incluídas no “Catálogo Galego de Especies Exóticas Invasoras” e 24 especies no “Catálogo Español de Especies Exóticas Invasoras”.

 

Localización privilexiada
No seu estudo, Hábitat determinou que o Golfo Ártabro Sur goza dunha localización privilexiada ao abrigo das inclemencias do mar aberto que permiten refuxiarse nas súas augas a multitude de especies mariñas que atopan nas rías o unas praderías mariñas, ecosistemas idóneos para levar a cabo o seu ciclo vital. Non son alleos tampouco á evolución sociodemográfica desta franxa litoral, unha das máis puxantes de Galicia, e recoñece a gran presión humana (urbanística, pesca, turística) que afecta ao medio. 

Así mesmo, a influencia do clima atlántico permite o correcto desenvolvemento dos ecosistemas terrestres típicos de zonas con temperaturas suaves e altas precipitacións, coma os bosques de árbores caducifolias. A gran variedade de ecosistemas sustentan unha rica biodiversidade de fauna e flora, algunhas delas endemismos do noroeste ibérico, con boas poboacións residentes na multitude de hábitats do territorio. 

A protección tanto a nivel específico como a nivel ecosistémico, con aplicacións de medidas de conservación efectivas e duradeiras, avaliacións e seguimentos poboacionais, melloras na xestión do medio, implicación e educación social, ademais dunha mellora na eficacia e desenvolvemento dos recursos do medio “serán medidas a ter en conta nunha zona tan ricamente biodiversa que cada día vese ameazada pola destrución dos seus hábitats”, sinalan nas conclusións finais.