Un proxecto financiado polo GALP Golfo Ártabro Sur, candidato a premio de boas prácticas de economía azul

Para reforzar a visibilidade do traballo que están a desenvolver os Grupos de Acción Local do Sector Pesqueiro (GALP) no período de programación 2014-2020 do Fondo Europeo Marítimo e de Pesca (FEMP), a Rede Española de Grupos de Pesca (REGP) elaborou un catálogo de boas prácticas no ámbito do Desenvolvemento Local Participativo (DLP) correspondente a proxectos aprobados nas convocatorias 2017-2018.

Que entendemos por “boa práctica”? Un proxecto ou iniciativa que cumpre os seguintes requisitos:

·         Ten un impacto positivo observable no seu ámbito de actuación

·         É sostible dende un punto de vista ambiental, económico e social

·         É sensible a colectivos desfavorecidos (mulleres, xóvenes, discapacitados, etc.)

·         É transferible, replicable e adaptable a outras iniciativas contextos e lugares.

·         Ten carácter innovador e aporta emprendemento

·         É o resultado dun proceso participativo

·         É perdurable no tempo

·         Xerou, ou pode xerar, novos empregos

O proxecto “Climatización Lonja – Eficiencia energética”, do GALP Golfo Ártabro Sur, candidato a premio de boas prácticas de economía azul para esta convocatoria, nace da necesidade do sector de volverse máis competitivo e de modernizar as súas instalacións, para estar dentro das premisas de eficiencia e crecemento azul.

O proxecto consiste, fundamentalmente, na modernización das instalacións lumínicas da lonxa da Coruña a través de tecnoloxía LED, que garante máis de 6 anos de durabilidade e permite unha importante mellora da eficiencia enerxética.

Con esta modificación na iluminación da lonxa, afórranse miles de KW de consumo eléctrico que axudan a mellorar a competitividade no sector e a posibilidade de manter o emprego. Ademais, déixanse de emitir á atmosfera unha parte das emisións contaminantes, o que provoca unha redución da pegada de carbono. Non podemos esquecer que a pesca é o noso foco principal e, con ela, os mares e os océanos a onde van a parar moitos dos contaminantes destas emisións. Con esta redución, buscamos que os nosos mares estean máis limpos e que os nosos pescadores, mariscadores e outros axentes que viven del teñan un porvir máis próspero e unha substitución xeracional no sector cos ollos postos en coidar o que nos dá de comer: o medio natural.

A contribución deste proxecto á Estratexia de Desenvolvemento Local Participativo (EDLP) vese reflectida nos seguintes puntos:

·         Aborda a problemática da redución da marca do carbono e o incremento da eficiencia enerxética

·         Incide na mitigación e adaptación ao cambio climático e transición a unha economía de baixas emisións de carbono

·         Soluciona os problemas derivados da gran demanda enerxética actual e da dependencia excesiva de combustibles fósiles

·         Impulsa modelos de produción e consumo máis sostibles, que permiten contribuír ao xa citado cambio climático

·         Contribúe á redución do impacto ambiental

·         Elévase como exemplo a seguir para outras lonxas e abre camiño á modernización e acondicionamento para ser mais respectuosos co medio natural

Os resultados obtidos son mesmo mellor do esperado: dado a eficiencia dos equipos instalados, redúcese a potencia consumida en máis dun 50%.