O GALP desenvolverá proxectos de aforro enerxético e divulgación científica por valor de máis de 1 millón de euros

·         As accións para a posta en valor dos produtos do mar ou o impulso da cultura mariñeira tamén forman parte dos 11 plans que o Golfo Ártabro Sur porá en marcha.

A Consellería do Mar e Desenvolvemento Pesqueiro aprobou os proxectos propostos polo Golfo Ártabro Sur para a primeira convocatoria de 2019. Neste ano desenvolveranse 11 iniciativas, das cales 5 son produtivas e 6 non produtivas. Todas elas terán un custo total de 1.408.468 euros. 

As iniciativas inclúen proxectos de mellora enerxética en diferentes instalacións do sector pesqueiro, plans de divulgación científica, accións para a posta en valor dos produtos do mar ou impulso da cultura mariñeira, entre outras cousas.

Neste ano os proxectos non produtivos (un total de 6), inclúen dous eventos de divulgación científica. Un deles é o Open Science Cambre, un acto no que os alumnos de diferentes escolas e clubs de ciencia poderán amosar os seus experimentos, algúns deles relacionados co mar. Este proxecto busca que ciencia e diversión se fundan nun. O territorio do Golfo Ártabro Sur acollerá o segundo proxecto de divulgación científica, o Festival Mar de Mares. Este evento constará de concertos, exposicións, encontros, proxeccións e outras moitas actividades.

Á súa vez os proxectos non produtivos do Golfo Ártabro Sur incluirán a iniciativa “Empreamar: Emprendemento mariño para o desenvolvemento sostible do Concello de Sada”, que busca contribuir ao desenvolvemento local, social, económico e ambiental de forma sostible no concello de Sada a partir da creación dun ecosistema de emprendemento.

Neste tipo de proxectos tamén hai un oco para a profesionalización no sector pesqueiro coa iniciativa “Actividade formativa de confección e mantemento de artes e aparellos e obtención do certificado de profesionalidade”, que pretende formar a 15 persoas na fabricación de aparellos de pesca.

Por outra banda desenvolverase a iniciativa “Maridar: 1º encontro sabor das mariñas”, que ten como obxectivo promocionar as micro, pequenas e medianas empresas que ofrezan produtos locais, tanto do mar como da terra.

O Golfo Ártabro Sur segue a investir nas instalacións do sector pesqueiro, modernizándoas e adaptándoas. Este ano levaranse a cabo 4 proxectos neste ámbito. Un deles será o de “Mellora da capacidade dos servizos do porto de Lorbé para o interese da colectividade”, que ten como obxectivo a optimización das operacións portuarias. Por outra banda, realizarase a “Mellora tecnolóxica en instalación do circuíto de cadea de frío da lonxa da Coruña”, un proxecto que instalará novos sistemas de tubaxe de refrixeración. Outra iniciativa destacable é a de “Mellora tecnolóxica en instalacións mecánicas da lonxa da Coruña”, que levará a cabo diversas accións na sala de máquinas e equipamentos. Dentro deste ámbito tamén se atopa o plan “Portas corredeiras da lonxa da Coruña”, que instalará 20 portas que permitirán mellorar a climatización.

Gastronomía e Marca “Empanadas do Mar”

A través dos proxectos “Mesón mariñeiro A Bordo” e “Proxecto para a fabricación e comercialización de empanadas do mar con produtos do Golfo Ártabro” o GALP pretende impulsar e dar a coñecer a gastronomía mariña do seu territorio. Nesta iniciativa crearanse tamén sinerxías cos produtores agrícolas da Reserva de Biosfera Mariñas Coruñesas e Terras do Mandeo. “Mesón Mariñeiro A Bordo” ten como finalidade abrir un local hostaleiro de temática mariñeira que poña en valor os produtos locais do mar, a cultura mariñeira e a gastronomía de calidade. Mentres que o proxecto de fabricación de empanadas rehabilitará un local comercial e comprará a maquinaria necesaria para que neste se poidan elaborar “Empanadas do mar”.