Mobiliario de formigón reciclado a partir de cáscara de mexillón, un exemplo de innovación e sostibilidade grazas ás axudas do GALP Golfo Ártabro Sur

No marco das axudas do GALP Golfo Ártabro Sur, levouse a cabo un proxecto innovador que demostrou como a sostibilidade pode transformar o sector da construción. A empresa Construcciones Ramos, grazas ao apoio recibido, diversificou a súa actividade coa creación dunha nova liña de negocio: a fabricación de mobiliario feito con formigón a partir de cáscaras de mexillón recicladas.

O proxecto centrouse na adecuación dunha nave industrial como espazo expositivo e comercial, onde se amosou esta nova gama de produtos. O obxectivo principal era empregar residuos mariños valorizados, aproveitando as cáscaras de moluscos como árido reciclado para a produción de formigón. Desta forma, non só se contribuíu a reducir a pegada ambiental, senón que tamén se puxo en valor o potencial dos refugallos mariños para crear produtos sostibles e innovadores.

Ademais, desenvolvéronse accións de comunicación e divulgación para destacar a importancia deste proceso produtivo. A exposición do mobiliario amosou non só a súa viabilidade comercial, senón tamén a posibilidade de transformar o sector da construción mediante prácticas máis respectuosas co medio ambiente.

Este proxecto é un claro exemplo do que se pode acadar grazas ás axudas do GALP, enfocadas na preservación e aproveitamento sostible dos recursos naturais das zonas costeiras. A través de iniciativas coma esta, pódese impulsar a economía circular, reducir a contaminación mariña e fomentar a conservación da biodiversidade.

Co apoio do GALP, proxectos coma este contribúen ao desenvolvemento económico e medioambiental da nosa comunidade, demostrando que innovación e sostibilidade poden ir da man.