Un cemiterio con moita historia nas costas galegas
Décadas de
investigacións nas augas galegas permitiron descubrir e identificar 1.600 pecios
de barcos, avións e submarinos afundidos na costa galega. Naufraxios que se
produciron desde o século XVI. Diferentes especialistas xa o definen como o
maior cemiterio naval europeo, e incluso o máis grande a nivel mundial. Un
atractivo para moitos investigadores que acoden á zona a descubrir a historia
dos restos que se atopan nas profundidades costeiras galegas.
Submarinos, cazabombardeiros,
mercantes e barcos históricos afundiron nestas augas, ben por mor das
inclemencias meteorolóxicas, por accidentes naturais ou como consecuencia das
guerras. A zona converteuse durante a Primeira e a Segunda Guerra Mundial nun
espazo que alemáns e británicos ansiaban controlar, e no que loitaban por auga
e por aire para cortar a subministración do inimigo. Na zona atopáronse 25
submarinos, maiormente de orixe alemá, 50 cazabombardeiros británicos e un planador.
Os afundimentos véñense producindo desde fai 2.000 anos, en moitas ocasións ao
chocar os barcos contra a cornixa atlántica ao ser arrastrados polas condicións
do mar.
Ademais,
durante as guerras, os británicos aproveitaban as correntes do verán para
atacar a península, e os españois facían o mesmo coas correntes de outono e
inverno. Porén, moitas tormentas provocaban o naufraxio dos barcos españois
contra a costa galega. Un exemplo disto son os oito galeóns que se atoparon á
altura de Corcubión. A maior parte dos naufraxios produciuse coa chegada dos
motores de vapor, xa que co obxectivo de aforrar carbón, as embarcacións
achegábanse á costa e acababan afundindo a causa das tormentas.
Comentarios
Publicar un comentario