O GALP ultima sinerxías para comezar o proxecto Tanza

• Representantes do GALP Golfo Ártabro Sur están a rematar a rolda de contactos con entes do mar e asociacións de inclusión social para poder comezar o proxecto.
• Na iniciativa conxunta participan outros cinco GALP de Galicia.

O Grupo de Acción Local do Sector Pesqueiro (GALP) Golfo Ártabro Sur está a ultimar a rolda de contactos coas asociacións de inclusión social e os entes do ámbito do mar do territorio para poñer en marcha o proxecto “Tanza: inclusión social, sector pesqueiro, economía circular”.

Esta iniciativa pretende impulsar a inclusión social e laboral das persoas con diversidade funcional no sector do mar. O GALP participa nela xunto cos outros GALP galegos que forman parte do proxecto: Golfo Ártabro Norte, Mariña – Ortegal, Costa da Morte, Costa Sostible e Ría de Arousa.

A iniciativa permitirá establecer sinerxías entre os diferentes entes do ámbito do mar e entidades de inclusión social, incrementando a empregabilidade das persoas con diversidade funcional. O proxecto tamén servirá para concienciar ao sector pesqueiro en materia medioambiental.

Ao longo das últimas semanas celebráronse xornadas de divulgación que tiveron por obxectivo establecer novos contactos e oportunidades dentro deste campo. Nesta fase inicial tamén se están a analizar as mellores vías de colaboración atendendo ás necesidades do sector.

A iniciativa aprobouse no marco da convocatoria 2020 de axudas dirixidas a programas de cooperación interterritoriais e transnacionais dos GALP no marco do Fondo Europeo Marítimo e de Pesca e conta cun investimento de máis de 108.700 euros.