A lonxa da Coruña renovou a súa maquinaria para ser máis eficiente

·         Leváronse a cabo dous proxectos de aforro enerxético, que impulsan un consumo que reduza a pegada de carbono,  contan co investimento do GALP Golfo Ártabro Sur.

Leváronse a cabo dous proxectos de aforro enerxético na lonxa da Coruña. Estes contaron cun investimento total de 455.751,00 € do cal 177.727,36 € a cargo das axudas do Grupo de Acción Local do Sector Pesqueiro (GALP) Golfo Ártabro Sur. Con estes proxectos realizáronse melloras tecnolóxicas en instalacións mecánicas e modernizáronse as instalacións do circuíto da cadea de frío da lonxa. Os dous proxectos tamén teñen como obxectivos contribuír á redución da pegada de carbono e diminuír custos á empresa para mellorar a súa competitividade, mantendo  postos de traballo.

Maquinaria moderna que enfríe e conserve o peixe e o marisco

Esta iniciativa modernizou a sala de máquinas e os equipamentos que abastecen de xeo e refrixeración ás zonas da lonxa onde se mantén, conserva e vende o peixe. As medidas inclúen a instalación dun novo Software de control centralizado da instalación frigorífica e modernización da tecnoloxía dos compresores. As accións teñen un custo total de 164.732 €.

Modernización do circuíto da cadea de frío

A partir deste proxecto instaláronse novas tubaxes de distribución de auga glicolada de refrixeración que da servizo a toda a lonxa e que permite a condución do frío a todos os compartimentos. Esta leva a refrixeración aos enfriadores de todas as salas de exposición de peixe da lonxa. Esta iniciativa, ademais de mellorar a eficiencia enerxética das instalacións, elimina o risco de contaminación microbiana dos produtos que se venden na lonxa, contando cun investimento de 291.019,42 €.