A reunión co sector pesqueiro finaliza a rolda de encontros do GALP para avaliar o seu traballo

·         Ao longo de dúas semanas a sede do GALP acolleu cinco encontros cos diferentes sectores do territorio na súa sede para coñecer os erros e os acertos da súa estratexia, e así poder reconducila.

·         Ás reunións acudiron representantes de concellos, do sector do mar, do empresarial e do social.

O Grupo de Acción Local do Sector Pesqueiro (GALP) Golfo Ártabro Sur rematou esta semana as súas reunións cos diferentes sectores do territorio. A asociación reuniuse co ámbito social, co marítimo, co económico e co público para coñecer a súa opinión con respecto ao traballo desenvolto polo GALP. 

Estas reunións realizáronse no marco da avaliación intermedia do GALP, coa que se analizará o cumprimento da súa Estratexia de Desenvolvemento Local Participativo (EDLP), co obxectivo de reconducir o plan cara un modelo máis eficiente.

No primeiro encontro, o da mesa do sector público, os asistentes remarcaron a importancia do labor do GALP, e sinalaron como principal problema o descoñecemento deste organismo, que pode axudar non só a entidades, senón tamén á cidadanía. Os seguintes encontros, que tiveron lugar na sede do GALP, reuniron ao sector social e ao económico. Tamén houbo un evento aberto a todas as persoas que quixeran coñecer o traballo do GALP e propoñer ideas. O punto e final a estas reunións púxoo o sector pesqueiro, que pechou esta fase do proceso de avaliación intermedia.