A Rede Rema impulsa o traballo colaborativo entre os museos e os GALP promotores

 

Representantes dos Grupos de Acción Local Pesqueira e dalgúns dos museos que compoñen a Rede de Espazos Museísticos Rede Rema desprazáronse ata Peniche (Portugal) para a presentación da exposición “O océano que nos une”.

Durante esta viaxe, e ao igual que durante a visita a Castrillón (Asturias) en outubro pasado, o programa incluiu un taller de traballo colaborativo entre os representantes dos museos adheridos á Rede REMA. O obxectivo era presentar unha serie de propostas innovadoras e un conxunto de boas prácticas para poder implementar nos espazos museísticos, así como proporcionar un espazo de intercambio de ideas e xeración de novas actividades colaborativas.

Tras a exposición de boas prácticas e exemplos de iniciativas noutros museos do mundo, xerouse un debate moi interesante sobre novas propostas para implementar nos centros da Rede, potenciando o traballo conxunto entre todos os membros.

 

Visitas a museos locais
Tras as xornadas de traballo, o grupo tivo a oportunidade de visitar o Museu Marítimo de Ílhavo, un dos centros que conforma a Rede de Espazos Museísticos do Atlántico (REMA); o Museu da Renda de Bilros ou o sitio arqueolóxico do naufraxio do San Pedro de Alcántara, lugar de obrigada visita para coñecer máis sobre o afundimento deste buque hai centos de anos.