Destacados profesionais en activo do sector mar-pesca fomentan o relevo xeracional entre universitarios e ensinanzas medias

O GALP Golfo Ártabro Sur organizou o xoves, 20 de outubro a primeira sesión da xornada “Profesións do mar” na ETS de Náutica e Máquinas en colaboración coa Universidade da Coruña. O próximo luns 7 terá lugar unha segunda parte no CIFP Universidade Laboral de Culleredo.

O acto de inauguración na na Escola Técnica Superior de Náutica e Máquinas estivo presidido polo reitor, Julio Abalde; o presidente de GALP Golfo Ártabro Sur, Alberto Castro; o director da Escola, Manuel Romero, e a xefa territorial na Coruña da Consellería do Mar; María Cancelo, que foi a primeira en intervir.

Cancelo quixo agradecer aos promotores da xornada a súa vontade de promocionar o emprego no sector pesqueiro favorecendo a incorporación das mozas e mozos galegos á actividade. Neste sentido, asegurou que a formación é clave para garantir a competitividade do sector marítimo-pesqueiro galego e que siga sendo un referente internacional. Para logralo, subliñou, é fundamental acadar a remuda xeracional nas distintas ramas de actividade pois iso permitirá preservar a súa fortaleza e manter a xeración de emprego e riqueza nas localidades costeiras. A xefa territorial recordou tamén o importante papel dos GALP para contribuír ao desenvolvemento económico dos seus territorios.

Neste sentido, Alberto Castro lembrou que unha das liñas de traballo do GALP Golfo Ártabro Sur é fomentar o relevo xeracional no sector mar-pesca a través de todo tipo de perfís, os máis tradicionais e os novos nichos. Por iso, destacou, “con este encontro formativo e divulgativo queremos amosar as amplas saídas laborais que hai da man, e voz, de grandes profesionais en activo, así como as vías para acceder a estes postos". “Por cada traballo no mar, xéranse catro en terra”, resumiu.

Pola súa banda, o director da ETS de Náutica e Máquinas, Manuel Romero, puxo en valor que, na actualidade, o mar é un dos sectores máis atractivos a nivel profesional recordando que “segundo a Axencia para a Calidade do Sistema Universitario de Galicia, dúas das nosas titulacións marítimas, o Grao en Máquinas Navais e o Grao en Náutica e Transporte Marítimo, son das mellores valoradas en canto a inserción laboral e condicións económicas”.

Julio Abalde, reitor da UDC, foi o último en dirixirse aos asistentes, animándoos a continuar formándose e tamén a aproveitar o coñecemento e visión extracurricular que brindan xornadas deste tipo. “O sector mar-pesca está cada vez máis aberto e a alta empregabilidade é o resultado dunha ensinanza académica de calidade e do recoñecemento externo a este talento”, resumiu.

 

Catro mesas temáticas
Esta primeira xornada de “Profesións do mar” reuniu a amplo abanico de profesionais dentro dos ámbitos da navegación, o salvamento marítimo, a loxística, os servizos offshore ou o medio ambiente contando con especialistas en enerxías renovables mariñas, empresas punteiras como Pérez Torres Marítima, ACSM, Forestal do Atlántico, empresas públicas como Navantia, profesorado universitario, representantes de organismos públicos como a Armada, o Instituto Español de Oceanografía, o Centro Tecnolóxico do Mar, a Sociedade de Salvamento e Seguridade Marítima, Portos do Estado ou da Mariña Mercante. A través das súas experiencias profesionais, académicas e vitais deixaron constancia, unha vez máis, que o mar é unha fonte de oportunidades para promover a substitución xeracional.

O encontro dividiuse en catro mesas de experienciais. A primeira dedicouse á temática “Navegación e Salvamento marítimo”; a Mesa 2 estivo centrada en “Transporte e Loxística”; a Mesa 3 en servizos offshore; e a cuarta e última, en medio ambiente. 

Próxima cita na Laboral de Culleredo
Esta xornada na ETS de Náutica e Máquinas completarase cunha segunda o vindeiro luns, 7 de novembro (9.00 a 15.00h) no CIFP Universidade Laboral de Culleredo. Aquí, as mesas temáticas versarán sobre Pesca e Marisqueo, Comercialización, Medio Ambiente, Salvamento Marítimo, Acuicultura e Turismo e divulgación.

 A xornada “Profesións do mar” é outra das actividades que o GALP Golfo Ártabro Sur incluíu na súa axenda 2022 con motivo da celebración do Ano Internacional da Pesca e Acuicultura Artesanais da FAO (AIPAA).