As experiencias vivas de catorce profesionais do mar visibilizan as amplas posibilidades do sector para fomentar novas vocacións

O GALP Golfo Ártabro Sur concluíu na Laboral de Culleredo a segunda xornada de “Profesións do mar” para fomentar o relevo xeracional.

Abriron o encontro Susana Rodríguez, D.X. Desenvolvemento Pesqueiro da Xunta de Galicia; Patricia Amado, vicepresidenta do GALP Golfo Ártabro Sur; Estanislao Mallo, xefe de estudos da Laboral e de Jessica Méndez, concelleira de Participación cidadá e Educación de Culleredo.

Este encontro forma parte da axenda 2022 do GALP Golfo Ártabro Sur con motivo do Ano Internacional da Pesca e da Acuicultura Artesanais.

Durante toda a mañá do luns, 7 de novembro, o CIFP Universidade Laboral de Culleredo converteuse nunha aula viva sobre o sector mar-pesca durante a segunda xornada sectorial “Profesións do mar” organizada polo GALP Golfo Ártabro Sur.

Catorce profesionais en activo, algúns con ata 40 anos de traxectoria, de diferentes perfís e sectores presentaron ante o alumnado como é o seu traballo diario e expuxeron as múltiples posibilidades de traballar nun sector estratéxico en Galicia, tanto polo peso que supón a nivel económico coma social. Puxeron voz ao mar o patrón dun barco de cerco, un mariscador a pé, unha praceira do mercado de San Agustín, técnicos de mantemento industrial, un buzo profesional, responsables de salvamento marítimo,... Segundo os últimos datos oficiais, o sector do mar é a cuarta actividade económica de Galicia, representa un 4,8% do PIB e, ademais, crea unha cadea de valor completa, con ampla capacidade de crecemento e diversificación.

Precisamente, unha das liñas de traballo do GALP é fomentar o relevo xeracional no sector mar-pesca a través de todo tipo de perfís, desde os máis tradicionais como poden ser o dos mariñeiros ou praceiras, a novos nichos como a divulgación ambiental e turismo mariñeiro e  aa contratacións de man de obra cualificada para novas funcións como o mantemento industrial. Por iso, o obxectivo destes encontros, tanto este da Laboral como o da ETS de Náutica (UdC) do pasado xoves, 20 de outubro, foi amosar as amplas saídas que pode haber da man, e voz, de profesionais en activo, así como as vías para acceder a estes postos.

Neste sentido, a vicepresidenta do GALP Golfo Ártabro Sur, Patricia Amado, recordou que “desde o GALP Golfo Ártabro Sur apostamos polo sector mar-pesca e polo imprescindible relevo xeracional”. Animou ao alumnado a seguir formándose e valorou a importancia da aprendizaxe continua.

En liña con isto, a directora xeral de Desenvolvemento Pesqueiro, Susana Rodríguez, destacou o traballo levado a cabo polos grupos de acción local do sector pesqueiro (GALP) a prol da remuda xeracional no sector marítimo-pesqueiro e para amosar a gran variedade de saídas laborais que ofrece. Así mesmo, lembrou que a Consellería do Mar reserva nos seus orzamentos de 2023 máis de 11M€ para garantir a actividade destes grupos que xogan un papel clave na dinamización socioeconómica das zonas costeiras de Galicia.

Pola súa banda, Estanislao Mallo, xefe de estudios do CIFP Universidade Laboral, resaltou a “formación práctica e moi completa” que adquire o alumnado na FP para traballar nun amplo abano de campos, agora tamén como 2º e 3º oficiais de Máquinas, ou as oportunidades que teñen en novos nichos como a mariña de ocio ou o mantemento de grandes superficies mariñas.

Jessica Méndez, concelleira de Participación cidadá e Educación de Culleredo, sinalou que "o noso municipio sempre estivo moi vencellado á actividade do mar, concretamente ao sector marisqueiro, e como todos sabedes grazas ás obras de dragaxe da ría do Burgo, a transformación que viviremos neste eido nos vindeiros anos será moi grande”.  

Catro mesas temáticas
Esta segunda xornada de “Profesións do mar” volveu reunir un amplo abanico de experiencias vitais en catro ámbitos: Pesca e do marisqueo, Comercialización, Salvamento marítimo, navegación e servizos portuarios, e Medio ambiente, turismo e divulgación ambiental. 

As voces convidadas foron Patricia Saavedra, ACERGA (Asociación do Cerco de Galicia), que xestiona o 80% da frota de cerco de Galicia; Lucía Fraga, coordinadora da área de Formación da Fundación CETMAR a través do centro Aixola; Andrés Pena, presidente dos Mariscadores a Pé da Coruña; e Manolo Presas, mariñeiro desde hai 40 anos e patrón do barco de cerco A Tenencia (Sada).

Tamén mostraron a parte viva do sector a placeira de quinta xeración do mercado de San Agustín, Ángela Barrán; Humberto Ferral, 35 anos como xefe de mantemento de Marfrío, empresa procesadora de produtos do mar conxelados; ou Jesús Porras, de Gesfrico, dedicada a equipamento industrial.

Na mesa de “Salvamento marítimo, navegación e servizos portuarios” estiveron Emilio Portela, xefe de máquinas con máis de 20 anos navegando offshore, en megacruceiros, e agora, en gaseiros; Marcos Riestra, da Sociedad de Salvamento y Seguridad Marítima (SASEMAR); Rafael Seijo, do servizo de practicaxe do Porto da Coruña; e Manuel Ruiz, buzo profesional e xefe de Operacións Hiperbáricas SASEMAR, con base en base Fene.

Falando de novos nichos especializados en medio ambiente, turismo e divulgación ambiental estiveron Rosa Chapela, coordinadora da área de Socioeconomía da Pesca en  CETMAR; Ana Suero, da empresa de ocio náutico Altavela (Sada); e María Calvo, de Arenaria Coordinación.

A clausura correu a cargo de José Garrote, secretario do GALP Golfo Ártabro Sur, e dun representante do CIFP Universidade Laboral.