O Proxecto Tanza senta as bases para a busca de novas sinerxias entre o sector pesqueiro e o da inclusión

 

O Proxecto Tanza pechou a súa andaina nun acto en Santiago de Compostela promovido polos 6 Grupos de Acción Local no Sector Pesqueiro promotores do proxecto: Galp A Mariña-Ortegal (coordinador), Golfo Ártabro Norte e Golfo Ártabro Sur, Costa da Morte, Costa Sostible e Ría de Arousa.

Esta derradeira xornada de Tanza congregou tamén aos responsables das entidades que promoveron as iniciativas de Tanza en cada territorio, así como entidades colaboradoras como o Laboratorio de Plásticos da Universidade da Coruña, a Escola Superior de Deseño Industrial de Galicia, Precious Plastic de Fair Enough, e a empresa de xestión de lixo mariño Recuperamos. Esta última, que é un proxecto de emprendemento financiado polo Golfo Ártabro Sur, expuxo o seu traballo para buscar posibles sinerxias con entidades de diversidade funcional.

En paralelo, puido visitarse unha mostra para a posta en común do labor desenvolto polas diferentes entidades de inclusión que participaron do proxecto, así como do Laboratorio de Plásticos da Universidade da Coruña e de Fair Enough.

 

Cooperación pesca-inclusión
Desde o arranque do Proxecto Tanza realizáronse máis dun cento de reunións de traballo ao longo de toda a costa galega nas que participaron máis de 180 entidades -sendo máis de 50 do ámbito pesqueiro- e implicáronse activamente máis de 20 concellos de entre os territorios do Grove a Ribadeo.

 Grazas a este traballo, seis iniciativas presentaron as súas propostas ao programa de axudas dos grupos de acción local no sector pesqueiro, obtendo todas elas financiamento para a súa execución. Tanza conseguiu financiamento dentro do programa de axudas dos GALP para seis proxectos centrados na cooperación entre o sector pesqueiro e o da inclusión, cun marcado pouso de coidado do medio ambiente.

 Así “Burela In”, “Ártabro Inclusivo”, “Diversiplás +Diversidade -Plástico”. O Centro para a transformación do lixo mariño do Concello de Outes, “Grove sostible” e “Amecomar- Amegrove” artelláronse conxuntamente entre o sector pesqueiro e o da inclusión para a posta en valor dos refugallos mariños e a sensibilización para loitar contra a contaminación das augas dentro e fóra do sector pesqueiro.