Viaxe de estudos para coñecer outros GALP do sur de España e de Portugal

Unha representación da directiva do GALP Golfo Ártabro Sur participa durante esta semana do 25 ao 29 de outubro nunha viaxe de estudos para coñecer en primeira persoa o funcionamento dos GALP Costa Luz e do GAL Sotavento, grupos veciños a ambos lados da fronteira española e portuguesa separados polo río Guadiana. O obxectivo desta experiencia é establecer sinerxias e coñecer os seus proxectos para traer novas ideas que aplicar no noso territorio.

© Cedida GALP Costa Luz 

Territorios transfronteirizos separados por un río
O ámbito de actuación de Costaluz enmárcase na comarca Costa Occidental de Huelva, coñecida internacionalmente como “Costa de la Luz”, que abarca desde a desembocadura do río Guadiana ata a do Odiel, incluíndo os municipios de Ayamonte, Isla Cristina, Lepe, Cartaya e Punta Umbría, que representan o 76% da poboación da comarca e nos cales a pesca é un sector produtivo de gran relevancia.

 Pola súa banda, o territorio de intervención do GAL Sotavento do Algarve engloba as zonas costeiras e ribeiras dos concellos Alcoutim, Castro Marim, Faro, Loulé, Olhão, São Brás de Alportel, Tavira, Vila Real de Santo António, que engloban o territorio natural e cultural da ría Formosa e do esteiro do Guadiana na ribeira portugesa.